loading...

“Hərf tanımayan” şagirdlər danışdı

Şagirdlər və onların oxuduğu məktəblər irəli sürülən ittihamları qəbul etmirlər.agirdlrin imtahan vermsi
Yazıb-oxuya bilməməsi iddia olunan şagirdlərin bir neçəsinin adı məlum oldu. ANS PRESS-in apardığı araşdırmadan bəlli oldu ki, rayon təhsil şöbələri artıq Tələbə Qəbulu üzrə Dövlət Komissiyası (TQDK) tərəfindən onlara təqdim olunan siyahı ilə bağlı ciddi tədbirlər görüblər. Belə ki, həmin təhsil şöbələri özləri də onlara təqdim olunan şagirdlərlə bağlı araşdırma aparıblar və nəticəsini rəsmi olaraq TQDK-ya göndəriblər.

“Kodlaşdırmanı düzgün apara bilməyən şagirdlər yazıb-oxuya bilməyən şagird kimi təqdim olunub”

“Bizim təhsil şöbəsinə 5 şagirdin ad və soyadı təqdim olunmuşdu. Həmin şagirdlərlə danışdıq, aydın oldu ki, onların hər biri ad və soyadını yaza bilir. Sadəcə buraxılış imtahanında kodlaşdırmada apardıqları səhvə görə TQDK onları savadsız – yazıb-oxuya bilməyən şagird kimi təqdim edib. Bununla bağlı biz öz mövqeyimizi artıq TQDK-ya göndərmişik”, – deyə Masallı Rayon Təhsil Şöbəsinin müdiri Aslan İbişov bildirdi.

Masallı rayonundan siyahıya adı daxil olan şagirdlərin təhsil aldıqları 5 məktəbdən biri olan Köçərli kənd orta məktəbinin direktoru Qafar Cabbarov bildirdi ki, Babayev Məhəmməd Əliağa oğlu zəif oxuyan şagirdlər sırasındadır. Amma bu, onun tamamilə savadsız olduğu demək deyil. “Onun davamiyyəti, oxumaq istəyi çox zəifdir. Amma adı çəkilən şagird zəif oxusa da hərf də tanıyır, ad və soyadını da yazır. Sadəcə xətti səliqəsizdir. Ola bilsin, onun yazdıqlarını başa düşməyiblər. Hazırda həmin şagird üçün xüsusi müəllimlər ayrılıb və onunla mütəmadi məşğul olurlar”, – deyə Qafar Cabbarov əlavə etdi.

Xəttimin səliqəsiz olmasına görə, mənim adımı “oxuyub-yaza bilməyənlər” siyahısına salıblar”

Şagird Məhəmməd Babayev özü də ona qarşı deyilən ittihamla razı deyil. “Düzdür, mən o qədər də yaxşı oxuyan şagird deyiləm. Amma mən adımı da yazıram, soyadımı da. Oxuya da bilirəm. Sadəcə, xəttim zəifdir, hərfləri tam aydın formada yaza bilmirəm. Ola bilsin, buna görə TQDK mənim adımı bu siyahıya salıb. Hazırda mənimlə müəllimlər məşğul olurlar. Oxumağa həvəsim də artıb. Mən daha yaxşı təhsil alıb, 11-ci sinif buraxılış imtahanında sübut edəcəm ki, oxuya da bilirəm, yaza da”, – deyə hazırda 10-cu sinifdə təhsil alan Məhəmməd Babayev əlavə etdi.

Alışan kənd orta məktəbinin direktoru Həbib Rüstəmov da onun məktəbində oxuyan şagirdə qarşı haqsızlıq edildiyini bildirir. “Düzdür, ola bilsin ki, bizim məktəbdə oxuyan Həsənov Elməddin Üzeyir oğlunun adının həmin siyahıya düşməsi düzgündür. Amma bunun səbəbi var. “TQDK-nın səbəb öyrənmədən şagirdə “oxuyub-yaza bilmirsən” deməsi düzgün deyil. Həmin şagirdin imtahandan öncə səhhətində ciddi problemlər yaşanıb. İmtahan vaxtı biz də bunu ciddiyə almamışdıq və onu imtahana aparmışdıq. Amma hazırda həmin şagird məktəbdə oxumur. O, təqaüdə çıxıb. Müalicə alır. İndi adını soruşsan da bilməz. Amma belə bir hadisə olmamışdan əvvəl şagird əlaçı olmasa da normal səviyyədə oxuyub”, – deyə məktəb rəhbəri bildirdi.

Masallı Rayon Təhsil Şöbəsi də bizə yaza bilməyi bacarmadığı iddia olunan şagirdlərin ad və soyadlarını da təqdim etsə də biz sizə yalnız onların təhsil aldıqları məktəblərin adını təqdim edirik.

Bakı Şəhəri üzrə Təhsil İdarəsi

Digər siyahını isə Lənkəran Rayon Təhsil Şöbəsindən öyrənə bildik. Təhsil Şöbəsinin müdir müavini Gülağa Bağırovun sözlərinə görə, həmin şagirdlərdən biri Boladi kənd 2 nömrəli məktəbin və 3-ü isə Gərgiran kənd orta məktəbinin şagirdləridir.

“Adları oxuyub-yaza bilməyən siyahıda olan şagirdlərlə əlaqə saxlaya bilməmişik. Buna səbəb isə həmin şagirdlərdən üçünün (oğlan) əsgərlikdə olması, birinin isə (qız) ailə həyatı qurması ilə bağlıdır”, – deyə G. Bağırov bildirdi.
Boladi kənd 2 nömrəli məktəbin direktoru Aidə Hüseynova onun məktəbində oxuyan şagirdlə bağlı məlumatın yanlış olduğunu dedi: “Bizim məktəbdən Məmmədzadə Elgün Eldar oğlunun adı həmin siyahıda var idi. Amma bunu nəyə əsasən belə etdiklərini anlaya bilmirik. Düzdür, hazırda həmin şagird hərbi xidmətdədir və onunla əlaqə saxlaya bilməyəcəksiniz. Amma mən sizi əmin edirəm ki, adı çəkilən şagird yaza da bilir, oxuya da. Ümumiyyətlə, bizim məktəbdə elə bir şagird yoxdur ki, nə yaza bilsin, nə də oxuya. Mən özüm şəxsən hər bir şagirdə imla da yazdırıram, mətn də oxutdururam”, – deyə direktor vurğuladı.

Aidə Hüseynova onu da əlavə etdi ki, hər il Boladi kənd 2 nömrəli məktəbdən universitetə yüksək balla daxil olan şagirdlər çıxır. Onun sözlərinə görə, şagird imtahanda kodlaşdırmada hansısa səhvə yol verə bilər, amma bu oxuyub-yaza bilməmək anlamına gəlmir.

Lənkəran Rayon Təhsil Şöbəsindən həmin şagirdlərin adları bizə təqdim olunsa da biz şəxsi məlumatlar olduğu üçün adları ictimaiyyətə təqdim etmək istəmədik. Çünki onlar da bu ittihamlarla razı deyillər.

Təəssüflər olsun ki, əlaqə saxladığımız bütün rayon təhsil şöbələrindən istədiyimiz informasiyanı ala bilmədik. Belə ki, onlardan çoxu TQDK tərəfindən onların şöbələrinə heç bir siyahının gəlmədiyini dedilər. Bəzi təhsil şöbələri isə siyahı almasalar da rayon üzrə bütün məktəblərdə təlim keçdiklərini və 9-11-ci sinif şagirdlərinin hamısının yazıb-oxuya bildiyini dedilər.

“TQDK 100 nəfərdən ibarət siyahıda adı olan şagirdlərlə bağlı ajiotaj yaradılmasının əleyhinədir”

Biz tam siyahını TQDK-dan da istədik. Amma onlar həmin şagirdlərlə bağlı ajiotaj yaradılmasının əleyhinə olduqları və eyni zamanda konkret şəxs haqqında fərdi məlumatların onun razılığı olmadan yayılmasının mövcud qanunvericiliyə zidd olduğu üçün təqdim etmədilər.

Siyahının nə üçün bütün rayon təhsil şöbələrinə göndərmədikləri məsələsinə gəldikdə isə TQDK- dan bildirdilər ki, qurum yalnız onlara müraciət edən şöbələrə informasiya göndərib.

“Qeyd olunan 100 şagirdlə bağlı bildiririk ki, onlar imtahan zamanı cavab kartında özləri haqqında məlumatları qeyd etməmiş və nəzarətçilərə bunun səbəbini yaza bilməmələri ilə izah etmişlər. Təbii ki, nəzarətçilər imtahan protokollarında bu barədə qeydlər aparıblar”, – deyə ümumtəhsil müəssisələrində təhsilalanların biliyinin yekun qiymətləndirilməsi sektorunun müdiri Vüqar Əkbərov bildirib.
”Oxuyub-yaza bilməyən şagird onlayn rejimdə sənədləşməni necə həyata keçirib ki, daha sonra imtahanda iştirak edib?”, ”soyad və ad yazılmamış cavab kartları TQDK-ya necə ötürülə bilər?” bu kimi ittihamlara cavab olaraq isə qurumdan belə münasibət verdilər: “Birincisi, abituriyentlərdən fərqli olaraq, şagirdlər haqqında məlumatlar onların özləri tərəfindən deyil, məktəb əlaqələndiriciləri tərəfindən məlumat bazasına daxil edilir və buraxılış imtahanlarında iştirak edəcək şagirdlərin siyahısı bu məlumat bazası əsasında müəyyən edilir. İkincisi, imtahanda hər bir şagirdə TQDK tərəfindən onun soyadı, adı, atasının adı, iş nömrəsi və oxuduğu sinif qeyd edilmiş cavab kartı təqdim edilir. Ona görə də şagirdin öz fərdi məlumatlarını yazıb-yazmamasından asılı olmayaraq cavab kartının kimə məxsus olması dəqiq məlumdur”, – deyə Vüqar Əkbərov bildirib.

Maraqlı faktlardan biri də odur ki, hər iki qurum bu məsələdə bir-birini ittiham edir.
TQDK-dan aldığımız məlumata görə, qeyd edilən şagirdlərlə bağlı məlumatlar Təhsil Nazirliyinə 23.06.2015 tarixli rəsmi məktubda təqdim edilib.

Təhsil Nazirliyindən isə bildirdilər ki, məsələni aydınlaşdırmaq üçün TQDK-ya müraciət olunsa da Nazirliyə TQDK-dan bu barədə heç bir məlumat daxil olmayıb.
Martın 29-da TQDK 9 və 11-ci siniflər üzrə 100 şagirdin oxuyub-yaza bilməməsi haqqında məlumat yayıb. Həmin 100 nəfərdən ibarət siyahını sizin də diqqətinizə çatdırırıq.

 

11-ci siniflər üzrə oxumağı və yazmağı bacarmayan şagirdlərin rayonlar (şəhərlər) üzrə sayı belədir: Sabirabad rayonunda 6 nəfər, Lənkəran rayonunda 4 nəfər, Hacıqabul rayonunda 3 nəfər, Tovuz rayonunda 2 nəfər, Daşkəsən, Gədəbəy, Qazax, Goranboy, İmişli, Astara, Lerik, Yardımlı və Masallı rayonlarının hərəsində 1 nəfər. 9-cu siniflər üzrə isə oxumağı və yazmağı bacarmayan şagirdlərin sayı belədir: Astara rayonunda 12 nəfər, Sabirabad rayonunda 9 nəfər, Lerik rayonunda 8 nəfər, Gədəbəy, Tovuz, Cəlilabad və Masallı rayonlarının hərəsində 4 nəfər, Qazax, Goranboy və Bərdə rayonlarının hərəsində 3 nəfər, Daşkəsən, Şəmkir, Ağstafa, Ağcabədi, Ağdaş, Yardımlı və Hacıqabul rayonlarının hərəsində 2 nəfər, Qax, Kəlbəcər, Qəbələ, Ordubad, Xızı, Ağdam, Xaçmaz və Cəbrayıl rayonlarının hərəsində 1 nəfər.

Təhsil sistemində yaranmış bu cür problemləri aradan qaldırmaq üçün Təhsil Nazirliyi və TQDK bir araya gəlməli, şagirdlərin istər məktəb illərində, istərsə də imtahanlarda səhvlərə yol verməməsi və savadsız şagird kimi böyüməməsi üçün hər iki qurum ciddi tədbir görməli, lazım gələrsə, şagirdlərlə mütəmadi təlimlər keçməlidirlər.

596 baxış
loading...
Admin profil şəkili

Admin

Saytımıza xoş gəlmisiniz. Əziz istifadəçi, saytda olan məlumatları paylaşmağı Unutma !

Bu haqda nə düşünürsən?